አዳማ ከተማ ውስጥ የመጠቀሚያ ጊዜ ያለፈባቸው እና ጥቅም ላይ የማይውሉ መድኃኒቶችን ማስወገጃ ማዕከል ተገነባ

[Semonegna]

በአስር ሺህ ካሬ ሜትር ላይ በ58 ሚሊዮን ብር ወጪ በአዳማ ከተማ የተገነባዉ ጊዜ ያለፈባቸው እና ጥቅም ላይ የማይውሉ መድኃኒቶችን ማስወገጃ ማዕከል 10 ሺህ ኪሎ ግራም በሰዓት የማቃጠል አቅም ያለው ሲሆን፥ በሌሎች 7 ከተሞችም 500 ኪሎ ግራም በሰዓት ማቃጠል የሚችሉ ማዕከላትም በመገንባት ላይ ይገኛሉ።

አዲስ አበባ (ሰሞነኛ) – የኢትዮጵያ የመድኃኒት ፈንድና አቅርቦት ኤጀንሲ በ100 ቀናት ዕቅድ የመጠቀሚያ ጊዜ ያለፈባቸው እና በተለያዩ ምክንያቶች ጥቅም ላይ የማይውሉ መድኃኒቶችን እና የህክምና ግብአቶችን ማስወገጃ ማዕከል ገንብቶ አስመረቀ።

በአስር ሺህ ካሬ ሜትር ላይ በ58 ሚሊዮን ብር ወጪ በአዳማ ከተማ የተገነባዉ ጊዜ ያለፈባቸው እና ጥቅም ላይ የማይውሉ መድኃኒቶችን ማስወገጃ ማዕከል (incinerator) ምረቃ ሥነ ስርዓትላይ የተገኙት የኢፌዴሪ የጤና ጥበቃ ሚኒስትሩ ዶ/ር አሚር አማን እንደተናገሩት፥ ማዕከሉ 10 ሺህ ኪሎ ግራም በሰዓት የማቃጠል አቅም ያለው ሲሆን፥ በሌሎች 7 ከተሞችም 500 ኪሎ ግራም በሰዓት ማቃጠል የሚችሉ ማዕከላትም በመገንባት ላይ ይገኛሉ ብለዋል። በቅርቡም ግንባታቸው ተጠናቆ አገልግሎት እንደሚጀምሩ ዶ/ር አሚር አክለው ተናግረዋል።

ጊዜ ያለፈባቸው መድኃኒቶች እና ግብዓቶች ማስወገጃ ማዕከሉ ለሀገራችን የመጀመሪያ ሲሆን ከዚሀ ቀደም በየተቋሟቱ በተለያዩ ምክንያቶች ጥቅም ላይ የማይውሉ ወይም የተበላሹ መድኃኒቶችን በማስወገድ ረገድ ይገጥሙ የነበሩ ችግሮችን ከመሠረቱ እንደሚፈታ የገለጹት ሚኒስትሩ፥ የምለሳ ሎጂስቲክ (recycle logistic) ስርዓትን በመተግበር የማያገለግሉ የህክምና ግብአቶች እና በባኅሪያቸው ጎጂ የሆኑ ኬሚካሎችን በዘመናዊ መንገድ አካባቢን በማይበክል ሁኔታ በማስወገድ ከዚህ ቀደም አካባቢ የሚበከልበትን ሁኔታ እንደሚያስቀር ተናግረዋል።

◌ የኢትዮ-አሜሪካውያን ዶክተሮች ቡድን እያስገነባ ያለው ዓለም አቀፍ አገልግሎት ይሰጣል ተብሎ የሚጠበቀው ሆስፒታል

ለዚህ ሥራ መሳካት ተባባሪ የሆኑ ያካባቢው ማኅበረሰብ አባላትና የአዳማ ከተማ ከንቲባ ጽ/ቤትን ያመሰገኑት ሚኒስትሩ፥ ማዕከሉ ለአካባቢ ነዋሪዎች ቅድሚያ ተጠቃሚ የሚያደረግ ስልጠናና የሥራ ዕድል በኤጀንሲው እንዲመቻችላቸውም ተናግረዋል።

የኢትዮጵያ የመድኃኒት ፈንድና አቅርቦት ኤጀንሲ ዋና ዳይሬከተር ዶ/ር ሎኮ አብርሀም በበኩላቸው የአዳማ ቅርንጫፍ ጽ/ቤት በሌላው ዓለም የሚተገበሩ ዘመናዊ አሠራሮችን በመቀመር የመድኃኒት እና የህክምና መገልገያ አቅርቦት እና ስርጭት የልህቀት ማዕከል ሆኖ ለሌሎች ቅርንጫፍ ጽ/ቤቶች መማማሪያ እንዲሆን ምቹ ሁኔታዎች መፈጠራቸውን ተናግረው ለአካባቢው፥ ማኅበረሰብም የሥራ ዕድል እየፈጠረ እንደሆነ እና በቀጣይም አጠናክሮ እንደሚቀጥል ገልጸዋል።

ምንጭ፦ የጤና ጥበቃ ሚኒስቴር / ሰሞነኛ ኢትዮጵያ
——
ሌሎች ዜናዎች፦

• ጅማ ዩኒቨርሲቲ ያስገነባው ዘመናዊ የህክምና ማዕከል ተመረቀ
• የሐረማያ ዩኒቨርሲቲ የህክምና ዶክተሮችን ለስድስተኛ ጊዜ አስመረቀ
• የቅዱስ ጳውሎስ ሆስፒታል የካንሰርና የልብ ህክምና ማዕከል ግንባታ 56 በመቶ ደርሷል
• ከሆዱ 120 ሚስማር የወጣለት ታካሚ መዳኑ ተገለጸ ― የቅዱስ ጴጥሮስ ስፔሻላይዝድ ሆስፒታል
• የቅዱስ ጳውሎስ ሆስፒታል እና የፌዴራል ፖሊስ ኮሚሽን የፎረንሲክ ምርመራ በጋራ ለማከናወን ተስማሙ

---

[Anonymous]

በአዲስ አበባ በ2.5 ቢሊዮን ዶላር ግዙፍ የጤና ከተማ ሊገነባ ነው (ሪፖርተር ጋዜጣ)

ቪዥን አፍሪካ ሆስፒታል የተባለው የግል ኩባንያ ከጤና ሚኒስቴር ጋር በመተባበር በ2.5 ቢሊዮን ዶላር ግዙፍ የጤና ከተማ ሆስፒታል በአዲስ አበባ ሊገነባ ነው፡፡

በሚቀጥለው ዓመት (ጥር 2012 ዓ.ም.) ይጀመራል የተባለው ይኸው የግንባታ ፕሮጀክት፣ በቦሌ ለሚ አይሲቲ ፓርክ በአንድ ሚሊዮን ስኩዌር መሬት ላይ የሚያርፍ ሲሆን፣ ለግንባታ የሚውለው ገንዘብ ከዓለም አቀፉ አበዳሪዎችም የሚገኝ መሆኑን የቪዥን አፍሪካ ሆስፒታል ኩባንያ ኮሙዩኒኬሽን ኃላፊ አቶ ቴዎድሮስ ታደሰ ለሪፖርተር ገልጸዋል፡፡

እ.ኤ.አ. በ2028 ይጠናቀቃል የተባለው ይኸው ፕሮጀክት፣ ከሁለት ዓመት በፊት ጀምሮ ቅድመ ሥራዎችን እያከናወነ እንደሚገኝና በዚህ ጊዜም በጣሊያን ዲዛይን ኩባንያ የተሠራው የሆስፒታሉ ሥነ ሕንፃ ዲዛይን መጠናቀቁንም ተናግረዋል፡፡

የጤና ከተማ ሆስፒታሉ አምስት ሺሕ አልጋዎች ያሉትና በቀን እስከ ሰባት ሺሕ ተኝተውና በተመላላሽ ለማከም የሚያስችል ሆስፒታል፣ ሦስት ሺሕ ተማሪዎችን በአዳሪነት መያዝ የሚችል የሕክምና ትምህርት ቤት፣ የአፍሪካ የባህል ማዕከልና ሙዚየም፣ ለኤምባሲዎችና ለዓለም አቀፍ ኩባንያዎች የሚያገለግሉ ቢሮዎች፣ ምግብ ማደራጃዎች፣ የገንዘብ ተቋማት፣ ባለአምስት ኮከብ ሆቴል፣ የስፖርትና የአካል ብቃት እንቅስቃሴ ማዕከል፣ ቤተ መጻሕፍት፣ የገበያ ማዕከል፣ ተጨማሪ የጤና ማዕከላትና ማኅበራዊ አገልግሎት መስጫ ተቋማት ይኖሩታል፡፡

ሙሉውን ሪፖርተር ጋዜጣ ላይ ያንብቡ

[Anonymous]

የህክምና መገልገያ መሳሪያዎች ፋብሪካ በኢትዮጵያ ሊነባ ነው (አዲስ አድማስ ጋዜጣ)

ተቀማጭነቱን በቻይና አድርጐ፣ በህክምና መገልገያ መሳሪያዎች ምርትና ሽያጭ፣ በህክምና ዘርፍ ምርምሮች አለም አቀፍ እውቅና ያለው ዋንፎ ካምፓኒ፤ የህክምና መገልገያ መሳሪያዎች ማምረቻ ፋብሪካውን በኢትዮጵያ ሊያቋቁም ነው፡፡ ፋብሪካው በቂሊንጦ ፋርማሲ ኢንዱስትሪያል ፓርክ ውስጥ የሚሰራ ሲሆን እ.ኤ.አ አቆጣጠር በ2020 ግንባታው ተጠናቆ ወደ ምርት እንደሚገባ ተገልጿል፡፡

ቻይናዊው ዋንፎ ካምፓኒ ዴልታ ኢንስትሩመንት ቴክኖሎጂ፣ EZM እና RE4 ኢምፖርት ኤክስፖርት ከተባሉ አገር በቀል አጋሮቹ ጋር በትብብር ለሚያቋቋመው ለዚሁ ፋብሪካ ከ10 ሚሊዮን ዶላር በላይ በጀት መመደቡንና የፋብሪካው ስራ ሙሉ በሙሉ ተጠናቆ ስራ በሚጀምርበት ወቅት ምርቶቹን ወደተለያዩ የአፍሪካ አገራት በብዛት ለማዳረስ እንደሚያስችል ተገልጿል፡፡

ኢትዮጵያን የህክምና መሳሪያዎች ማኑፋክቸሪንግ እምብርት ለማድረግ በዝግጅት ላይ እንደሆነ የገለፀው ዋንፎ ካምፓኒ፤ ይህም ለአገሪቱ የስራ ዕድል ፈጠራ ከፍተኛ አስተዋጽኦ ያደርጋል ተብሏል፡፡

ትናንት በሸራተን አዲስ ሆቴል በተካሄደው ጋዜጣዊ መግለጫ ላይ እንደተነገረው፤ ዋንፎ ካምፓኒ ከሶስቱ አገር በቀል አጋሮቹ ጋር በመሆን በአፍሪካ እጅግ ተፈላጊ የሆነውን የወባ፣ የኤችአይቪ ኤድስ እና የእርግዝና ምርመራ ማድረጊያ የህክምና መሳሪያዎችን ሌሎች መገልገያ ቁሳቁሶችን ለማምረት የሚያስችለውን ፋብሪካ በአገራችን ያቋቁማል፡፡ ፋብሪካው በሁለት ዓመት ጊዜ ውስጥ ግንባታው ተጠናቆ ሙሉ በሙሉ ወደ ስራ እንደሚባና ለፋብሪካ ማቋቋሚያው ከተያዘው በጀት 3 ሚሊየን ዶላር የሚሆነው ለፋብሪካ ግንባታው እንደሚውል ተገልጿል፡፡

አዲስ አድማስ ጋዜጣ

[Author]

Posts